அவனே என் தோழன்

என் படுக்கை வரை பயணிக்கும்
இரவல் தோழன் இவன்
அவன் சுகந்தத்தைச் சுவாசித்தே
பரிமளிப்பவள் நான்

என் தலையணை மட்டும் அறிந்த
ரகசியங்கள் அறிகிறவன்
சதா என் மனவெளியில்
உலவிக்கொண்டு இருப்பவன்

என் விரல்களை முத்தமிட்ட
படியே நடை பயில்விப்பவன்
இமைகள் படபடக்கும் அந்த
நொடிப் பொழுதும் என்
கருவிழிகளோடு இயைந்தே
பயணிப்பவன்

என் குறைகளை அறிந்தவனாகவும்
கலக்கங்களைத் தெளிவிப்பவனாகவும்
என் சுயத்தைக் காத்து
இடித்துரைப்பவனாகவும்

என் மெளனத்தை உடைப்பவனாகவும்
பேசியே என்னை மெளனத்தில் ஆழ்த்துபவனாகவும்
ஊடலையும் உவகையையும் மாறித் மாறி
தருபவனாக இருக்கிறான்

நானும் அவனும் வேறுவேறு
பாலினமாய் இருந்தபோதும்
வெறுப்பை உமிழவோ
ஆதிக்கம் செலுத்தவோ
மட்டம் தட்டவோ இவன்
முயல்வதில்லை

எந்த முன்னுரிமையும் எடுக்காமல்
எனக்கான வெளிகளை அப்படியே
விடுகிறான்

என் மடிமீதும் மார்மீதும் உறங்கும்
கோடுதாண்டா அஃறிணை உயிர்
இவன்

மூன்றே வாரம் என்னுடன் பயணிக்கும்
பொது நூலகத்து நூல் அவன்