இளைய தமிழ்

இளைய தமிழ்
எங்கும் நிறைந்த தமிழே!
பார்! எங்கும் பார்!
உனக்கு எத்தனை விழிகள்!
எத்தனை செவிகள்!
நீ பரந்து விரிந்து விட்டாய்
அண்டம் கொண்டு விட்டாய்
அணுவில் புகுந்து விட்டாய்

புலம் பெயர்ந்தவன்
தாய் மடி தேடினானோ இல்லையோ
இளைய தமிழே!
கட்டாயம் உன்
தமிழ் மடி தேடுவான்
நான் உன் இதழ்களைத் தேடினேன்
முத்தமிட இல்லை
வாசிக்க! சுவாசிக்க!

இளைய தமிழே!
இணையத்தில் உனக்கு இரண்டாமிடமாம்
ஓ! உன் அழகுக்குக் காரணம்
புலம் பெயர்ந்தவன்
பின்னிய வலையோ? - வாழ்க! தமிழன்
கணினியில் குடிபுகுந்தாய் - நித்தம்
என் கண்ணிலே கடை விரித்தாய்
உண்ணும் உணவானாய்!
வாழும் கலையானாய்!
காணும் கனவானய்!

இளைய தமிழே!
அப்படி என்ன உனக்கு
அவனோடு சினேகம்?
என் குழந்தையின் நாவில்
இப்படி ஆடுகிறாய்!
விளையாடுகிறாய்!
நின் ஆங்கிலத் தோழனோடு
சரி, இருந்துவிட்டுப் போகட்டும்
அவனும் சுகமான சுமைதான்!

இளைய தமிழே!
நித்தம் காலையில்
கண் விழிக்கும் முன்
செவி விழிப்பேன்
உன் ஒலி கேட்க!
ஒலியில் கேட்க!

இளைய தமிழே!
என் இதயம் கொண்டவளே
ஐம்புலன்களிலும் புகுந்துவிட்டாய்
புலம் பெயர்ந்து புலம் பெயர்ந்து
புவியாட்சி செய்கின்றாய்
உன் ஆசி வேண்டுகிறேன்